TARJIMAYI HOL Men – Pozilov Hamidjon Ikromjon o‘g‘li 1989-yilning 18-sentabrida Dang‘ara tumani Uch-uyli qishlog‘ida ziyoli oilada dunyoga keldim. Dadam Ikromjon Pozilov 1951-yil 6-avgustda tug‘ilgan, kasblari – haydovchi edi. Ular og‘ir xastalikdan 1997-yilning 9-iyunida 46 yoshlarida vafot etganlar. Onam 1956-yil 20-dekabrda dunyoga kelishgan, kasblari – yengil sanoat muhandisi bo‘lgan. Hozirda – pensioner. Men 1996-yilning 2-sentabridan qishlog‘imiz yaqinidagi 17-sonli Hamid Olimjon nomidagi umumta’lim maktabiga 1-sinfga qabul qilindim va o‘qiy boshladim. Boshlang‘ich sinflarni a’lo baholar bilan shu yerda tamomladim. Fanlarga qiziqishim juda baland edi. Ayniqsa o‘qish-adabiyot fani menga o‘zgacha olam kasb etardi. Shu sababdanmi, o‘zim ham she’r va hikoyalar mashq qilib turardim. Oilaviy sharoit va vaqt taqozosi bilan umumiy o‘rta ta’limni 2005-yilda Qo‘qon shahriga qarashli Muqimiy shaharchasidagi 30-maktabda tamomladim. Shu yilning o‘zida Qo‘qon 1-akademik litseyiga o‘qishga kirdim va u yerda 3 yil ta’lim oldim. 2008-yili Toshkent Davlat Jahon tillari universitetining Xalqaro jurnalistika fakultetiga o‘qishga hujjat topshirdim. Ammo imtihonlardan o‘tolmadim. Lekin, astoydil niyat qilgan ekanmanmi, Alloh bu niyatimni 13 yildan so‘ng ro‘yobga oshirdi. 2020-yilda shahrimizda ochilgan yangi oliy ta’lim muassasasi – Qo‘qon universitetiga Boshlang‘ich ta’lim yo‘nalishiga o‘qishga qabul qilindim. Ungacha tirikchilik uchun zarur bo‘lgan pul topish yo‘lida vijdonim qabul qilgan turli kasb va hunar ishlari bilan mashg‘ul bo‘ldim. 2015-yilning yozida oila qurdim. Hozirda onam, men, rafiqam va ikki nafar qizalog‘im bilan baxtli hayot kechirmoqdamiz. Sportning foydali turlariga qiziqaman. Ba’zan she’r ham yozib turaman. Kelajakda tanlagan kasbimning yetuk mutaxassisi bo‘lish va oilam, xalqim, Vatanim uchun hamisha kerakli, munosib inson bo‘lishni xohlayman. Istagim jamiyat va davlatning har tomonlama tinch, farovon, sog‘lom va go‘zal taraqqiy etishidir. Pozilov Hamidjon Ikromjon o‘g‘li Hamid Ikrom (2024-yil 24-aprel)