Rustamov Shamsiddin Salohiddin o‘g‘li, 1990-yil 4-noyabrda Samarqand viloyati Urgut tumani Ipakli mahallasida shifokor oilasida tug‘ilgan. Millati o‘zbek. 1997-yilda Urgut tumanidagi 29-sonli maktabning 1-sinifiga qabul qilingan. 2008-yilda ushbu maktabning 11-sinfini tamomlab, 2009-yilda Samarqand Davlat Universiteti Tarix fakultetiga o‘qishga qabul qilingan. 2013-yilda Tarixchi mutaxassisligi bo‘yicha o‘qishni tamomlagan. 2013-yilda Samarqand Davlat Universitetining magistratura bosqichiga o‘qishga kirgan. Magistratura bosqichini 2015-yilda Tarixshunoslik va manbashunoslik tarixiy tadqiqot usullari mutaxassisligi bo‘yicha tamomlab magistr darajasini olgan. 2021-yilda Samarqand Davlat Universitetiga Mustaqil tadqiqotchi (PhD) sifatida oʻqishga qabul qilingan. Oilali, ikki nafar farzandi bor. Shamsiddin Rustamov 2015-yil sentyabridan 2017-yilga qadar O‘zbekiston madaniyati tarixi davlat muzeyida arxeologiya bo‘limi katta ilmiy xodimi, 2017-yil yanvaridan 2020-yil iyul oyiga qadar O‘zbekiston madaniyati tarixi davlat muzeyida Tarix bo‘limi mudiri lavozimlarida faoliyat olib borgan. 2020-yil iyul oyidan boshlab hozirgi vaqtda “Samarqand” davlat muzey-qo‘riqxonasi ilmiy kotibi lavozimida faoliyat olib bormoqda. U oʻz ilmiy izlanishlarini “XIX asr oxiri XX asr birinchi yarmi Samarqand tarixini yoritishda kinofotofono hujjatlar, tasviriy sanʼat asarlarining ahamiyati (“Samarqand” davlat muzey-qoʻriqxonasi fondi asosida)” mavzusi doirasida olib bormoqda. Shamsiddin Rustamov o‘z ish faoliyati davomida Samarqand viloyatining XIX asr oxiri XX asr boshlari tarixiga doir 7 ta ilmiy maqolalar muallifi. 3 ta xalqaro ilmiy konferensiya ishtirokchisi hisoblanadi. 2021-2022-yillarda “Samarqand” davlat muzey qoʻriqxonasining fondlarida saqlanayotgan, ekspozitsiyalarida namoyish etilayotgan ashyolar asosida yaratilgan “Oʻzbekistonda yozuvning paydo boʻlishi”, “Amir Temur maqbarasining oʻrganilishi”, “Metallga badiiy ishlov berish tarixi”, “Mirzo Ulugʻbek muzey-majmuasi”, “V.L.Rojdestvenskiy asarlarida ikkinchi jahon urushi”, “Otkritkalarda Oʻzbekiston tarixi”, “Frontdan maktublar” kataloglarining yaratilishida muharrirlik qilgan. Hozirgi vaqtda “Samarqand” davlat muzey-qo‘riqxonasi fondi ashyolari asosida tadqiqotchi sifatida o‘z ilmiy ishini davom ettirmoqda. 2017-2022 yillar davomida O‘zbekiston madaniyati tarixi davlat muzeyida “Mustaqillik”, “O‘zbekiston dunyo madaniyatlari chorrahasida”, “Qozog‘iston manzaralari”, “Samarqand muzeyidan fotolavhalar”, “Buyuk mamlakatning buyuk me’mori”, 18-oktabr Samarqand shahri kuni munosabati bilan “Kechagi Samarqandning bugungi manzarasi”, O‘zbekiston Respublikasi Prezidentining 5 ta tashabbusi doirasida "Ijodning mo‘jizasi”, Samarqand viloyati Nurobod tuman Sazag‘on mahallasida “Samarqand muzeyidan foto lavhalar”, Toyloq tuman Jumabozor qishlog‘ida “Samarqand muzeyidan fotolavhalar” hamda O‘zbekiston Respublikasining birinchi Prezidenti I.Karimov tavalludining 82 yilligiga bag‘ishlangan “Buyuk mamlakatning buyuk me’mori”, Ishtixon tumani Mirishkor qishlog‘ida buyuk mutafakkir, shoir va davlat arbobi Alisher Navoiyning 579 yilligiga “Navoiy shoirlar sultoni”, shuningdek, Zahiriddin Muhammad Boburning 537 yilligiga bag‘ishlangan “Zahiriddin Muhammad Bobur shoh va shoir” nomli ko‘chma ko‘rgazma, ko‘rgazma va ekspozitsiyalarini tashkil qilgan. Shuningdek, O‘zbekistonda xizmat ko‘rsatgan rassom P.P.Benkovning 140 yilligiga bag‘ishlangan “Soyada uxlayotgan quyosh”, Qirg‘izistonning Sulaymon-Too milliy tarixiy-arxeologik muzey majmuasi bilan hamkorlikda Samarqand davlat muzey-qo‘riqxonasida “Sulaymon-Tou butunjahon merosi”, Namoz Sultonov xotirasining 80-yilligiga bag‘ishlangan “San’atga baxshida umr”, Registon maydonidagi Ulug‘bek madrasasida “O‘zbek ayollari” foto ko‘rgazmasi”, Amir Temur tavalludining 683 yilligiga O‘zbekiston madaniyati tarixi davlat muzeyida “Amir Temur maqbarasining o‘rganilish tarixidan”, "Tasviriy va amaliy san’at xaftaligi" doirasida tashkil etilgan "Vatan mening nigohimda", 18 may “Xalqaro muzeylar kuni”ga bag‘ishlangan “Samarqand muzeyi durdonalari”, “Sharq taronalari” xalqaro musiqa festivaliga bag‘ishlangan “Olamga taralgan sharq taronasi”, Ergash Jumanbulbul o‘g‘li uy muzeyi, “Sharq taronalari” xalqaro musiqa festivali munosabati bilan Hoji Abdulaziz Abdurasulov uy-muzeyi, Sadriddin Ayniy uy-muzeyi ko‘rgazmalarining tashkil qilinishida o‘zining ilmiy va amaliy ishlari bilan ishtirok etgan. Shu bilan birga muzeyshunoslik sohasida aloqalarni rivojlantirishga o‘z hissasini qo‘shib kelmoqda. Shamsiddin Rustamov intizomli, odobli, harakatchan, talabchan va mehnatsevar inson sifatida mehnat jamoasi, soha rahbarlari orasida hurmatga sazavor. Yuqori ish hajmi hujjatlar ijrosini tezkor va sifatli boʻlishini, ishlab chiqiladigan hujjatlarning qonun hujjatlariga mos kelishini taʼminlash maqsadida, hozirgi faoliyatini inobatga olgan holda davlat idoralarida ish yuritish boʻyicha malaka oshirish uchun yillik rejaga kiritilgan. Shamsiddin Rustamov oilasi mahallada o‘z o‘rni va obro‘-e’tiboriga ega bo‘lgan oilalardan biri hisoblanadi. O‘zining yaxshi xulqi va odobi bilan mahalladagi tengdoshlari orasida ajralib turadi, do‘stlaridan yordamini ayamaydi.