Abstract

Maqolada qonun ustuvorligini taʼminlashda zamonaviy mexanizmlarning yaratilishi haqida soʻz yuritilib, mamlakatimizda amalga oshirilayotgan maʼmuriy islohotlarning mazmuni aniq misollar bilan ochib berilgan. Davlat xizmatlarini koʻrsatish va davlat boshqaruvini raqamlashtirish yoʻnalishidagi oʻzgarishlar tahlil etilib, uning samaradorlikni taʼminlashdagi oʻrni koʻrsatilgan. Shuningdek, davlat boshqaruvida qonuniylik va samaradorlikni oshirishga yoʻnaltirilgan takliflar ilgari surilgan. Taʼkidlash lozimki, mamlakatimizda “Elektron hukumat” tizimini rivojlantirish boʻyicha eʼtiborga molik ishlar amalga oshirilmoqda. Chunki davlat xizmatlarining fuqarolarga elektron shaklda, yaʼni interaktiv davlat xizmatlari shaklida koʻrsatilishi koʻplab muammolarni bartaraf etishga hissa qoʻshadi. Rivojlangan xorijiy mamlakatlarda davlat boshqaruvini faol raqamlashtirish jarayonlari yuz bermoqda. Ushbu imkoniyatlar tufayli boshqaruvga oid koʻplab ortiqcha xarajatlar tejalib, davlat va fuqaro oʻrtasidagi munosabatlar raqamli texnologiyalar vositasida tartibga solinmoqda. Bu esa davlat boshqaruvidagi byurokratik toʻsiqlarni qisqartirishga, korrupsiyaviy holatlarning oldini olishga imkon bermoqda. Ushbu jarayonlar mamlakatimizda ham davlat boshqaruviga zamonaviy texnologiyalarni kengroq joriy etish asosida davlat xizmatchilarining vazifalarini qayta koʻrib chiqishni taqozo etmoqda.